Kaligirang Pangkasaysayan ng Dokumentaryong Pampelikula

Ang mga bagay na nasisilayan ng ating mga mata at naririnig ng ating mga tenga ay may kaakilap na epekto sa ating mga pananaw at paraan kung paano tayo kumilos at makipagkapwa. Masasalamin ito sa mga eksena o drama na makabuluhan at maiuugnay sa ating araw-araw na pamumuhay. 

Marahil ay naiisip mo ang mga dokumentaryong pampelikula na ating napapanood sa telebisyon o mga cinema. Ang mga ito ay madalas tumalakay sa mga napapanahong isyu na may kinalaman sa kahirapan, kultura, at maging politiko.

Sa sulating ito, ating bibisitahin ang layuning tinataglay ng mga dokumentaryong ito at kung paanong ang mga ito ay nagsisilbing pambukas sa mga matang may piring ng maling propaganda at binilog ng masalimuot na pantasya.

Dokumentaryong Pampelikula (Inedit sa Canva)

Ano ang dokumentaryo at pelikula?

Ang dokumentaryo ay isang anyo ng midya na ang layunin ay magbigay ng impormasyon at mga kwento batay sa makatotohanang karanasan ng isang indibidwal o lipunan. 

Kadalasang mga isyung panlipunan ang ginagamit na tema upang magmulat, magturo, at magbigay-inspirasyon sa mga manonood. Sa likod ng bawat dokumentaryo ay detalyado at masusing pagsasaliksik. 

Sa kabilang banda, ang pelikula naman o pinilakang tabing, ay isang biswal na sining ng pagkwekwento. Ang bawat karakter ay mahusay na ginagampanan ang kanilang parte. Dahil dito, mas epektibong naihahatid ang mensahe ng pelikula at talaga namang umaantig sa puso ng nakararami.

Ginagamitan ito ng mga artistikong elemento tulad ng iskrip na ginagamit ng mga aktor, musika na nagpapatindi ng emosyon, at sinematograpiya na nagpapahanga sa mga manonood.

Kung pagsasamahin ang dalawa, mabubuo ngayon ang tinatawag nating dokumentaryong pampelikula. Isa itong uri ng midya kung saan malikhaing sinasalaysay ang mga makatotohanang impormasyon. 

Kaligirang Kasaysayan ng Dokumentaryong Pampelikula

Kung babalikan naman ang mga nagdaang dekada, malalaman na nagsimula ang dokumentaryong pampelikula noong taong 1900. Sinasaad nito ang iba’t ibang mga eksena ng mga indibidwal kagaya ng araw-araw na gawain kung kaya't tinawag itong aktwal na tanawin o eksena.

Mula sa salitang French na cinema vertile, na ang ibig sabihin ay film truth, ang bawat dokumentaryong pinapalabas ay mas nagiging makabuluhan dahil na rin sa makatotohanan at aktuwal na pagtatagpo at pag-uugnay ng mga pangyayari.

Ang Layunin ng Dokumentaryong Pampelikula

Isa sa mga layunin ng ganitong uri ng palabas ay maghatid ng makabuluhang impormasyon na naglalaman ng sari-saring kwento na malapit sa puso ng bawat Pilipino. Maliban dito, hinihikayat din ang mga manonood upang buksan ang isipan sa kamalayang panlipunan.

Ang bawat eksenang natutunghayan ay produkto na layuning magbukas sa mata ng bawat indibidwal sa mga kadalasang sinasantabi pati rin ang mga malalalim na isyu na nauugnay sa ating pang-araw-araw na pamumuhay.

Mula sa mga problemang panlipunan, kultura, edukasyon, hanggang sa mga kwento ng tagumpay at inspirasyon, nag-iiwan ang mga ito ng mensahe na sumasagi sa isipa't kaibuturan ng puso ng bawat manonood.

Konklusyon

Ang panonood ng mga dokumentaryong pampelikula na ito ay hindi isang libangan na pumapatay ng oras. Ito ay mabisang paraan na tumutulong sa pag-unawa sa realidad ng buhay. Ang mga kwento at impormasyon na hanahatid ng mga dokumentaryo ay hindi hinabi ng malikhaing pag-iisip kundi ng pagsasaliksik na pinagtuunan ng maraming oras at pansin. Dahil dito, nag-iiwan ang mga ito ng malalim na marka sa kaisipan ng mga manonood.

At sa panahon ngayon kung saan ang teknikal na kakayahan ng tao ay higit pang pinabuti ng makabagong teknolohiya, marapat lamang na gawing instrumento ang panonood ng mga dokumentaryong pampelikula sa pagbabago ng mga pananaw na tinatakpan ng maling akala. 

Oras na para gawin itong daan upang makamit ang tunay na katotohanan na pilit binabahiran ng kasinungalingan ng mga mapaglinlang.