Mga Popular na Babasahin: Magasin, Tabloid, Komiks, atbp.

Ang pag-usbong ng makabagong lipunan ay siya ring pagsilay sa modernong mukha ng tradisyunal na panitikan. Bagama't naiiba na ang kaalamang teknikal ngayon dahil na rin sa mga makabagong teknolohiya, naroon pa rin ang ibinibigay na aliw ng mga popular na babasahin sa atin.

Marahil nakakita ka na o nakabasa ng isang komiks, magazine, tabloid, at dagli. Mula noon hanggang ngayon, ang mga print media na ito ay nananatiling buhay at kinagigiliwan ng tao.

Mga pinagdugtong-dugtong na piraso para makabuo ng representasyon sa mga popular na babasahin. (Inedit sa Canva)

Sa kabila ng mabilis na pag-usbong ng teknolohiya at digital na media, nananatiling buhay ang interes sa mga tradisyonal na babasahin na ito. Ang mga ito ay hindi lamang nagsisilbing libangan, kundi nagiging bahagi rin ng pang-araw-araw na buhay at pagkakakilanlan.

Kaya naman sa sulating ito, mas mapapayabong ang pagbabasa na isang mahalagang bahagi ng ating kultura bilang mga Pilipino. 

Magazine: Eleganteng Pagpapahayag ng Impormasyon 

Litrato mula sa Unsplash

Ang mga magasin ay kilala sa kanilang elegante, organisado at kaakit-akit na presentasyon ng nilalaman mula pa lang sa cover nito.

Sa Pilipinas, ang ilan sa mga sikat na magazine na patuloy na umuugong ang pangalan sa masa ay ang Metro at YES! Magazine. Ang magasin na ito ay nagbibigay ng siksik na impormasyon tungkol sa iba't ibang bagay lalo na fashion, showbiz, at lifestyle.

Maliban sa mga artista at Philippine fashion trends na talagang patok sa mga Pilipino, ang iba'y nahuhumaling din sa ibang nilalaman nito kagaya ng iba't ibang lifestyle.

Mas dumagdag pa sa epektibong pagbibigay impormasyon ang mga matitingkad na kulay nito. Sa ganitong paraan, mas madali nilang mahuhubog ang kaugnayan sa kanilang mambabasa.

Tabloid: Mga Balitang Abot-Kamay ng Masa

Isang halimbawa ng Tabloid.

Isa rin sa mga kinagigiliwang basahin ng mga Pilipino ay ang mga tabloid. Naging bahagi na ito ng pang-araw-araw nating pamumuhay, lalo na ang mga ama, lolo at tito natin tuwing umaga o kaya nama'y tuwing siyesta.

Tatlo sa mga nangunguna at sikat pa ring pahayagan ngayon ay ang Abante, Pilipino Star Ngayon at Bulgar. Bagama't maiikli lamang ang mga impormasyong inilalahad, masasabing siksik na ito. Kumbaga, walang labis at walang kulang.

Hindi katulad sa mga magasin na matitingkad ang kulay, ang mga tabloid naman ay hindi gaanong makulay. Gayunpaman, pareho itong nagbibigay-aliw at naglalahad ng mga datos.

Komiks: Ginuhit na Kwento

Isang bata na nagbabasa ng komiks. (Mula sa Unsplash)

Kung meron pang isang babasahin na bagama't pinaglipasan na ng panahon pero hindi pa rin nawawala ang karisma sa masa ay ang komiks.

Simula pa noon, ang mga komiks ay patuloy na nagiging libangan na basahin ng nakakarami dahil na rin sa bahagi ito ng kasaysayan ng ating bansa. Mula sa klasikong Pugad Baboy ni Pol Medina Jr. hanggang sa mga modernong komiks na mababasa at matutunghayan natin sa iba't ibang social media, ito ay patuloy na nagbibigay-aliw at edukasyon.

Ito rin ay isang anyo ng sining. Mula sa pinagsama-samang makukulay na ilustrasyon at naratibo, naihahayag ng gumuhit ang kaniyang mga ideya at damdamin na nais iparating sa madla. Dahil dito, ang komiks ay isang epektibong daluyan ng mahahalagang isyu sa lipunan katulad ng mga temang may kaugnayan sa kahirapan, korupsiyon, at diskriminasyon.

Sa kabila man ng pag-usbong ng telebisyon at internet, nananatili ang impluwensiya nito sa iba’t ibang anyo ng media. Isang patunay dito ang mga pelikula at serye na batay sa komiks, katulad ng Darna at Ang Panday. 

Dahil rin sa makabagong teknolohiya at pagkamalikhain ng mga Pilipino, muling sumisigla ang industriya ng komiks sa Pilipinas dahil sa digital platforms.

Konklusyon

Ang mga popular na babasahin tulad ng komiks, tabloid, at magasin na siyang tampok sa sulating ito ay mahahalagang bahagi ng kinagisnan nating mga Pilipino. 

Ang komiks ay malikhaing nag-aalok ng kasiyahan at sining sa pamamagitan ng mga kwento at ilustrasyon. Ang tabloid ay nagdadala ng mabilis na balita tungkol sa mga isyu ng lipunan na madaling maunawaan ng masa sa abo't kayang presyo. Ang magasin ay nagbibigay ng eleganteng impormasyon at lifestyle content na tumutugon sa iba't ibang interes ng mga mambabasa.

Sa kabila ng mga pagkakaibang ito sa layunin at nilalaman ay nagpapakita naman kung paanong ang bawat anyo ng babasahin ay tumutugma sa mga pangangailangan at kagustuhan ng mga mambabasa. 

Ang mga hamon ng digital na pagbabago ay hindi maiiwasan. Gayunpaman, nananatili ang mga ito bilang mahalagang daluyan ng impormasyon, sining, at libangan. Bilang isang mamamayan, ang suporta sa lokal na industriya ay isang paraan upang mapanatili ang makulay na kultura ng ating pagkukuwento, pagpapahayag, at pagkakaisa sa gitna ng modernisasyon.